ഒരു റാന്തല്‍ വെളിച്ചം…

ചരിത്രം കടന്നു ചെല്ലാത്തയിടങ്ങളുണ്ടാവും. ഇരുള്‍മൂടിയ സ്ഥലങ്ങള്‍, തെരുവുകള്‍, ചെറ്റപ്പുരകള്‍… ഇവിടെയൊക്കെ ജീവിതങ്ങളുണ്ട്. ജീവിതത്തോട് പൊരുതി നിന്നവര്‍, അവരുടെ സ്‌നേഹവും, സങ്കടങ്ങളും… അതും ചരിത്രമാണ്. ആ കാലത്തേയും ചരിത്രത്തോടൊപ്പം കൊളുത്തെടുക്കേണ്ടതുണ്ട്. കാലം മറന്നു പോയേക്കാവുന്നവരുടെ ജീവിതത്തിലേക്കും ചരിത്രത്തിലേക്കുമുള്ള അന്വേഷണമാണിത്. അവര്‍ ജീവിതം പറയുകയാണ് നാം കേട്ടിരിക്കുന്നു.. അത്രമാത്രം…

കോഴിക്കോട് മാനാഞ്ചിറയില്‍ കഴിഞ്ഞ 25 വര്‍ഷത്തോളമായി പുരാവസ്തുക്കള്‍ വില്‍ക്കുകയാണ് പി.എം അബ്ദുറഹ്മാന്‍. പാലക്കാട്ടുകാരനായ അബ്ദുറഹ്മാന്‍ സ്റ്റീല്‍ പാത്രം വില്‍ക്കാനാണ് കോഴിക്കോട്ടെത്തിയത്. പിന്നീട് പാത്രവില്‍പ്പന മാറ്റി പുരാവസ്തുക്കള്‍ ശേഖരിച്ചുള്ള വില്‍പ്പനയായി. മാനാഞ്ചിറ സ്വയറിലെ മരച്ചുവട്ടിലായിരുന്നു കച്ചവടം. മരം മുറിച്ചപ്പോള്‍ പിന്നെ റോഡരികിലേക്ക് മാറ്റി… ഇനി അബ്ദുറഹ്മാന്‍ പറയും, കോഴിക്കോടും പാലക്കാടും കൂടിക്കലര്‍ന്ന ഭാഷയില്‍…

പണ്ടൊക്കെ എല്ലാ വീട്ടിലും പോയാല്‍ സാധനങ്ങള്‍ കിട്ടുമായിരുന്നു. ഇന്ന് പത്ത് സാധനങ്ങള്‍ കിട്ടാനില്ല. കൊടുത്ത് കൊടുത്ത് മതിയായി. പത്ത് വീടുകളില്‍ കയറിയാല്‍ രണ്ട് സാധനം കിട്ടും. പത്തിരുപത് പീസ് കിട്ടണമെങ്കില്‍ രണ്ടാഴ്ചയോളം ലൈനില്‍ കറങ്ങണം. അതും അടുത്ത് സ്ഥലങ്ങളിലൊന്നുമില്ല. ഉള്‍പ്രദേശങ്ങളില്‍ മാത്രം. പാലക്കാടാണെങ്കില്‍ നെന്മാറ, കഞ്ചിക്കോട് അതിര്‍ത്തികളില്‍, റോഡില്‍ നിന്ന് വിട്ട് ഉള്‍പ്രദേശങ്ങളില്‍ അതായത് വയലുകളൊക്കെ കടന്ന് മനകളില്‍ എത്തണം. അവിടെ ചെന്നാല്‍ സാധനങ്ങള്‍ കിട്ടും. പിന്നെ ചില വീടുകളില്‍ എക്‌സ്‌ചേന്ഞ്ച് ചെയ്ത് വാങ്ങും. അവരുടെ സാധനങ്ങള്‍ വാങ്ങി പുതിയത് നല്‍കും. വില കൊടുത്ത് വാങ്ങിക്കാന്‍ പ്രയാസമാണ്.
ഗ്രാമഫോണ് ഇപ്പോ പഴയ മിഷിന്‍ വെച്ച് പുതിയത് സെറ്റ് ചെയ്യുകയാണ്. പഴയത് രണ്ട് മൂന്നെണ്ണമുണ്ട്്. പഴയത് ഉള്ളത് ഇവിടെ വെക്കാന്‍ പറ്റില്ല. എന്റെടുത്തുള്ളതിന് 14,000 രൂപ വില വരും. അത് 16,000 രൂപക്ക് വില്‍ക്കേണ്ടി വരും. അത് ആരും വാങ്ങൂല്ല. പക്ഷെ പഴയത് അറിയുന്നവര്‍ അത് വാങ്ങും. പഴയ മോഡലിന് 3000-4000 രൂപക്ക് വില്‍ക്കാനാകും.
പണ്ട് കാലത്ത് 25 കൊല്ലം മുമ്പ് പാത്രങ്ങള്‍ വിതരണം ചെയ്യലായരുന്നു എന്റെ പണി. പാത്രങ്ങള്‍ ഇന്‍സ്റ്റാള്‍മെന്റിന് കൊടുക്കല്‍. അങ്ങിനെ പോകുമ്പോള്‍ വീട്ടുകാര് എന്നോട് പറയാ… ഇന്ന സാധനം(പുരാവസ്തുക്കള്‍) കിട്ട്വോന്ന് നോക്ക് എന്ന്. അങ്ങിനെ ആ പരിപാടി തെറ്റില്ലാന്ന് തോന്നിയപ്പോഴാണ് കംപ്ലീറ്റ് സ്റ്റീല്‍പാത്രം ഉപേക്ഷിച്ചത്. മാനാഞ്ചിറ സ്‌ക്വയറിലെ മരത്തിന്റവിടെയായിരുന്നു ആദ്യം കച്ചവടം. മരം മുറിച്ച ശേഷം ഇവിടെയാണ്. അന്നത്തെ അത്ര കലക്ഷന്‍ ഇപ്പോളില്ല. ഉള്ളത് ഇവ്ട കൊണ്ട്വന്ന് വിക്ക്വ.
പഴയ വീടുകളെല്ലാം പൊളിച്ച് ഇപ്പോള്‍ ഫഌറ്റാണ്. പണ്ട് വീട് പൊളിച്ച് സാധനങ്ങള്‍ വിറ്റവരെല്ലാം ഇപ്പോള്‍ തിരിച്ച് ആവസ്യപ്പെട്വാണ്. പഴയത് വല്ലതുമുണ്ടെങ്കില്‍ കൊണ്ട് വരണമെന്ന്. പണ്ട് തട്ടുംപൊറത്തിട്ട് കെടന്ന സാധനാ ഇത്. പിന്നെ പൊറത്ത് വെച്ച് കാണുമ്പാ ഇതിന്റെ രസം കാണുന്നത്. അവര് ചോദിക്കുമ്പോ അത് കൊടുക്കാന്‍ പറ്റാത്ത വെഷ്മാണ് ഇപ്പോള്ളത്.
ഇപ്പോള്‍ ഫുള്‍ടൈം ഇത് തന്നെ വര്‍ക്ക്. സാധനങ്ങള്‍ കിട്ട്യാല്‍ സെയ്‌ലാകും. സാധനങ്ങള്‍ കിട്ടാനുള്ള വെഷ്മാണ്. വാങ്ങാന്‍ ആളുണ്ട്. ആവശ്യക്കാര്ണ്ട്. പക്ഷെ സാധനങ്ങളില്ല. പഴയ മോഡലില്‍ പുതിയതുണ്ടാക്കി കൊടുക്കേണ്ടി വരും. അത് നമ്മളെ മെറ്റല്‍ ഐറ്റംസില്‍ പറ്റൂല്ല. അങ്ങിനൊക്കെ പുടിച്ച് നിക്ക്വാണ്.
എഴുത്തോലകള്‍ കിട്ടീറ്റ്ണ്ട്. പക്ഷെ സംസ്‌കൃതത്തിലാ. സംസ്‌കൃതം നമ്മക്ക് അറിയൂലല്ലോ. പിന്നെ വാങ്ങാന്‍ വരുന്നോര്‍ക്ക് മനസിലാകും. എന്താ വെല എന്ന് ചോദിക്കും. അപ്പോ നമ്മള് രണ്ടായിരോ മുവ്വായിരോ ചോദിച്ചാല് ടെക്ക്ന്ന് എട്ത്ത് തരും. പിന്നീട് അവര് വന്ന് പറയും നിങ്ങള് തന്ന ഓല വളരെ ഉപകാരപ്പെട്ടു, മരുന്നുണ്ടാക്കിയെന്ന്. അത് അവര്‍ കംപ്യട്ടറിലെട്ത്ത്ട്ട് സപ്ലെയ് ചെയ്തിട്ട് പൈസണ്ടാക്കും.

പിന്നെ പണ്ട് കാലത്ത് കിട്ടിയതില്‍ ഒരു കിണ്ടി മാത്രമാണെന്റെട്ത്ത്ള്ളത്. അത് തങ്ങന്‍മാര് വെള്ളം ജപിച്ച് കൊടുക്ക്ന്നതാ. അതില്‍ ദേവനാഗിര ഭാഷയില്‍ എഴുതിയിട്ടുണ്ട്. കിണ്ടിന്റെ പൊറത്ത് ചിത്രപ്പണികളുമുണ്ട്. കിണ്ടി ഒരു മുറിയില്‍ വെക്ക്വാണ് ചെയ്യ. കിണ്ടിയെടുത്ത് പുറത്ത് വെക്കണമെന്ന് തങ്ങന്‍മാര്‍ പറയും. ആരെങ്കിലും വിഷം തീണ്ടി വരുന്നുണ്ടാവം അപ്പോള്‍. അത് അവര്‍ക്ക് അറിയാനാകും. ആ പാത്രമാണ് ഇപ്പോ എന്റെടുത്ത്ള്ള.് 25 കൊല്ലം മുമ്പ് കണ്ണൂര് പോയപ്പോ അറക്കല്‍ ഫാമിലീന്ന് കിട്ട്യതാണ്. അയിന്റൊരു പ്രത്യേകത കാരണം അതങ്ങനെ വെച്ച്ട്ട്ണ്ട്. ബാക്കിയെല്ലാം കൈമാറിക്കൈമാറിപ്പോയി. കിണ്ടി ഇപ്പോള്‍ കൊട്ക്കില്ല. അത് ഒരു സാധനല്ലേ ഉള്ളൂ. അതവ്‌ടെ കെടക്കട്ടേന്ന് കരുതി.
പിന്നെ ഒരു സപ്രമഞ്ചം കട്ടിലുണ്ടായിരുന്നു. അത്‌നെക്കുറിച്ച് പത്രത്തിലെ റിപ്പോര്‍ട്ട് വന്നു. ആ പത്രം അച്ചാര്‍ പൊതിഞ്ഞ് ഓസ്‌ട്രേലിയയിലേക്ക് അയച്ചു. ആ പത്രക്കഷ്ണം കണ്ട് ഓസ്‌ട്രേലിയയില്‍ നിന്ന ഒരാള്‍ വിളിച്ചു. അയാള്‍ പറഞ്ഞയച്ച ആള്‍ പിറ്റേന്ന് പുലര്‍ച്ചെ തന്നെ വീട്ടിലെത്തി പണം കൈമാറി സാധനവുമായി പോയി.
വീട്ടിലാണ് സാധനങ്ങള്‍ സൂക്ഷിക്കുന്നത്. സാധനങ്ങള്‍ കലക്ട് ചെയ്യുകയാണ് പ്രയാസം. പലരും വീട്ടിലേക്ക് കയറ്റില്ല. ചിലര് കൊടുക്കൂലയെന്ന് പറഞ്ഞ സാധനങ്ങള്‍ മറ്റ് പലരെയും കൊണ്ട് റെക്കമന്റ് ചെയ്യിച്ചാണ് സംഘടിപ്പിക്കുന്നത്.
സ്വദേശം പാലക്കാടാണ്. ഇവിടെ വന്നിട്ട് പത്ത് മുപ്പത് മുപ്പത്തഞ്ച് കൊല്ലമായി. അതുകൊണ്ട് കോഴിക്കോടുമായി നല്ല ബന്ധമാണ്. പഴയ കലക്ഷനില്ലല്ലോ അപ്പോ സാധനങ്ങളുമില്ല. കുട്ടികളൊക്കെ ഈ ജോലികൊണ്ട് പഠിച്ചു. അതാണ് ഇത്‌കൊണ്ട് കിട്ടിയ നേട്ടം. സാധനങ്ങള്‍ തീര്വാണ്. അതോട് ഞമ്മളും സൈഡാകും.

തയ്യാറാക്കിയത്: കെ എം ഷഹീദ്